Nagapadayon ang rehabilitation kag redevelopment sang Libas Fishing Port sa Roxas City agud mapaayo kag mamodernisar ang pasilidad nga ginagamit sang mga lokal nga mangingisda kag iban pa nga naga-engage sa industriya sang pangisdaan.
Sa interview sang Bombo Radyo kay Garret Ansel S. Baes, City Government Assistant Department Head, iya ginpahayag nga padayon ang ila ginahimo nga tikang para sa rehabilitasyon kag pagpaayo sang nasambit nga fishing port.
Suno kay Baes, yara na sa first phase sang proyekto ang pagpatindog sang mga haligi ukon poste nga mangin bahin sang ginaplanong mas modernisado nga pasilidad sang pantalan.
Dugang pa sini, ginatuyo sang proyekto nga mahatagan ang mga mangingisda sang mas maayo nga pasilidad nga makabulig sa pagpaayo sang ila mga operasyon kag pagpasanyog sang industriya sang pangisdaan sa syudad.
Paagi sa redevelopment, ginapaabot nga mangin mas episyente ang mga aktibidad sa pantalan, ilabi na sa pagdumala sang mga produkto nga halin sa pangisdaan kag sa pagserbisyo sa mga mangingisda nga nagasalig sa nasambit nga pasilidad.
