ROXAS CITY – Wala sang anuman nga pamahog sang pagpamomba ukon pagpang-atake sa Rehiyon Sais.
Ini ang ginpahayag ni Lt. Col. Sisenando Magbalot Jr., ang battalion commander sang 61st Infantry Battalion sang Philippine Army sang mainterview sang Bombo Radyo.
Suno kay Magbalot nga wala sang anuman nga pamahog sa seguridad sa isla sang Panay kasunod sang natabo nga pagpamomba sa Jolo, Sulu cathedral kag pagpasigabong sang granada sa isa ka mosque sa Zamboanga City.
Ginpahayag ni Magbalot nga hugot ang ginapatigayon nga seguridad sang militar sa bulig man sang Philippine National Police.
Sa pihak sini, padayon sa pagpahanumdom ang militar sa publiko nga magpabilin nga nakaalerto kag gilayon magpalab-ot sang mga impormasyon sa otoridad kun may mga makaduluda nga mga indibidwal sa ila lugar.
Ginpaandaman man sini ang publiko nga indi gilayon magpati sa mga ‘text scare’ nga ila mabaton sa baylo idangop ini sa mga otoridad agud gilayon nga ma-verify.
