ROXAS CITY – Daku nga bulig ang pag-operate sang City Diagnostic and Laboratory Center sa siyudad sang Roxas agud magpatigayon sang Real Time-Polymerase Chain Reaction or RT-PCR Test sa Hortus Botanicus, Barangay Milibili, Roxas City.
Ini ang ginpahayag ni Department of Health Region 6, Regional Director Marlyn Convocar kadungan sang inagurasyon nga ginpatigayon sang Martes, Oktubre 20, 2020.
Suno kay Convocar nga pinaagi sini mapadasig ang pagpaguwa sang resulta sang mga indibidwal nga nagpatigayon sang swab test kag matumod kun sin-o ang dapat nga ipaidalom sa isolation ukon screening.
Target sang amo nga pasilidad nga maka-test sang 100 ka mga specimen sa tagsa ka-adlaw.
Mahibaluan nga yara sa ika-lima nga puwesto ang probinsya sang Capiz sa may pinakamadamo nga kaso sang COVID-19 sa Rehiyon 6.
Samtang, gindayaw naman ni Convocar ang maayo nga tikang sang lokal nga gobyerno sang siyudad sang Roxas.
