ROXAS CITY – Pormal na nga gin-inagurahan kag ginturn-over sa gobyerno sang siyudad sang Roxas ang Regional Evacuation Center sa Hortus Botanicus sa Barangay Milibili, Roxas City.
Ang seremonya ang ginpangunahan mismo ni Roxas City Mayor Ronnie Dadivas nga gintambungan sang magkatuhay nga mga ahensiya sang gobyerno kalakip na ang Office of the Civil Defense (OCD), Department of Public Works and Highways, Department of Social Welfare and Development (DSWD), Department of Health kag madamo nga iban pa.
Suno kay Engr. Oliver Zamora sang DPWH-Capiz, ang nasambit nga pasilidad ang may pondo nga kapin sa 36 milyones pesos.
Ginpahayag sini nga sadtong Hulyo tuig 2017 sang ginsuguran ang konstruksiyon sa amo nga pasilidad kag sadtong Disyembre sang nakaligad nga tuig 2018 pa ini natapos apang naatrasar ang pagturn-over sini matapos nakitaan sang pila ka mga depekto.
Ang 2-storey accommodation building ang sarang makaakomodar sang kapin sa 53 ka mga pamilya nga may prayer room, communication area kag storage room kag mahimo man ini magserbe nga play area.
Magluwas sa main building, ang proyekto nagalakip sang male and female toilet and bath, generator room, pump room, laundry/drying area, kag materials recovery facility (MRF).
May ara man ini sang infirmary building nga magaserbe nga hospital para sa ginamasakit ukon pilason nga evacuee, may pharmacy kag opisina sang Disaster Risk Reduction Management Council (DRRMC) kag Office of the Civil Defense (OCD).
May ara man ini sang standard ramps, persons with disability (PWD) comfort rooms kag wheelchair access ways para sa mga PWD evacuees. PHOTO FROM RCFS
