ROXAS CITY – Malayo man sa iya gintapos nga propesyon bilang isa ka nurse, apang bangud sa inspirasyon sini nga kinahanglan sang pagplano agud maprotektahan ang aton dunang manggad, nagpursige ang isa ka Tapaznon nga mag-eskwela sang urban and regional planning, kag sa karon, isa na ka Professional Environmental planner.
Sa interview sang Bombo Radyo kay Stephen Faeldin, RN, EnP, nga taga-Brgy. Camburanan, banwa sang Tapaz, isa ini sa 108 nga mga nakapasar sa bug-os nga Pilipinas sa ginpatigayon nga Environmental Licensure examination sang Hulyo 2022, suno diri, nga indi nangin madali ang iya gin-agyan agud lamang malab-ot ang iya handom.
Aminado si Faeldin nga nag-abot ang tion nga ginpangluyahan ini sa pagpadayon sa pag-eskwela sa UP Visayas, bangud samtang naga-eskwela sa adlaw sang Sabado kag Domingo, nagatrabaho pa ini sa iban nga mga inadlaw.
Apang, bangud sa iya dedikasyon, determinasyon kag pagtuo sa Makaako, natigayon sini nga malampuwasan ang mga pagtilaw sa iya pagtuon kag naangkon ang panibag-o naman nga propesyon.
Ginpakigbahin man ni Faeldin ang tion nga nareyalisar sini nga luyag niya mangin Environmental planner, sang nagtrabaho ini sa DSWD, kag diri naintindihan niya kun ano ka importante nga may pagatahakon nga plano para sa komunidad kag palibot.
Madamo man suno diri nga dapat kalay-uhon pag-abot sa development sang aton palibot sa Capiz kag importante nga may yara sang Environmental planner ang kada banwa, ilabi na nga sa karon nga tinion nga masami apektado sang kalamidad ang probinsya.
Adbokasiya sini amu nga ilakip ang Indigenous Peoples (IPs) sa tanan nga mga plano pag-abot sa pagprotektar sang dunang manggad.
Nagapati man si Faeldin nga may rason kag mangin mabinungahon ang iya pagpursige nga mabuligan ang aton environment, pinaagi sa pagplastar sang maayo nga tikang para sa palibot.
Sa karon, nagatrabaho ini sa isa ka special project sang DSWD-KALAHI nga gintugyan sa iya sang LGU Tapaz.
