ROXAS CITY – Kadungan sang ginapangatubang nga Coronavirus Disease ukon COVID-19 Pandemic padayon man nga nagasaka ang numero sang kaso sang suicide incidents sa probinsya sang Capiz.
Sa interview sang Bombo Radyo kay Just Lynn Panaligan, Psychometrician kag katapo sang City Social Welfare and Development Office (CSWDO) nga naalarma na ang talatapan sa padayon nga pagsaka sang suicide sa probinsya partikular na sa siyudad sang Roxas.
Isa sa mga rason nga ginpat-ud ni Panaligan amo ang depression ukon stress kun sa diin kalakip sa mga rason nga naga-komiter ang isa ka persona sa paghikog.
Suno kay Panaligan nga may yara sang sirkumstansya nga nagapangatubang sang mabug-at nga problema ang isa ka tawo kun sa diin ginapanumdom sini nga wala na sang rason nga mabuhi pa.
Ginpahayag sini nga daku man ang responsibilidad sang pamilya kag abyan sa mga indibidwal nga nagabatyag sang depression kag importante gid ang pagpangamuyo.
May yara man sang malain nga epekto sa isa ka indibidwal ang paggamit sang gadgets ukon paglantaw sa mga social media partikular na sa mga kabataan nga may yara sang problema sa kabuhi.
Gani, nagpanugyan si Panaligan nga indi gid madulaan sang paglaom bangud mahimo man ini nga malampuwasan sa ulihe pinaagi sa bulig sang pamilya kag mga abyan.
Dugang pa ni Panaligan nga kun may yara sang nabatyagan nga kasubong sini nga sitwasyon dapat gid nga ipalantaw ang imo nga kondisyon sa isa ka mental health professionals agud nga mabal-an man ang mga nagakaigo nga impormasyon natuhoy diri.
Samtang, indi man lipod sa ihibalo sang tanan nga kadam-an sa mga naga-komiter sang suicide amo ang mga kalalakinhan bangud man sa limitado lamang sila magpakigbahin sang ila nga problema kun ikumparar sa mga kababainhan.
