ROXAS CITY – Madasig nga napuno ang listahan sang mga luyag nga magtambong kag makita sang personal si President Ferdinand ‘Bongbong’ Marcos, Jr., sa iya nga pagbisita sa Singapore, sa Setyembre 6-7, 2022.
Ini ang ginpahayag ni Bombo International Correspondent Zion Paras, tumandok sang Nasagud, Bolo, Roxas City, apang kapin 29 katuig na nga nagatrabaho sa Singapore.
Suno diri, ginpaskil sa Philippine Embassy nga sumugod Agosto 30 tubtob Setyembre 4, kinahanglan anay magparehistro ang mga luyag nga magpadulong sa National University of Singapore, para sa pakighinala kaupod ang kapin 1,700 nga mga katapo sang Filipino community kag ni PBBM.
Apang, Setyembre 1 palang, fully booked na ang amu nga listahan, gani magalantaw nalang ini sang state visit ni Marcos, pinaagi sa live streaming.
Ginalauman man nga magapadulong si PBBM sa palasyo sang Singapore, kaupod ang mga opisyal sang ila gobyerno, sa pagpanguna ni President Halimah Yacob.
Nagapati si Paras nga wala man sang mga reklamo nga ipalab-ot ang Filipino community sa Presidente sang Pilipinas may kaangtanan sa ila pagtrabaho sa Singapore, bangud sa iya pagpanilag sa sulod sang 29 katuig sini nga pagtenir sa amu nga pungsod, maayo ang ila sitwasyon kag ang pagtratar sang mga employer sa ila nga mga OFW’s.
