ROXAS CITY -Nagapadayon sa karon ang pagbaton sang Commission on Elections (COMELEC) sa mga luyag magparehistro para sa maabot nga 2022 National Elections.
Ini ang ginpahayag ni City Election Officer Atty. Jomar Alyzar Betita sang mainterview sang Bombo Radyo.
Suno sa kay Betita nga ginakasubo sini ang pag-nubo sang numero sang mga nagaparehistro humalin sang pagsugod sang registration subong nga bulan.
Ginpahayag sini nga kapin 200 pa gid lamang ang natigayon nga makarehistro sa nasambit nga talatapan.
Ginganyat man sini ang publiko nga magparehistro na kag likawan nga ang pagparehistro sa last minute kun sa diin tuman na ka atrasado ang tyempo.
Apang naintindihan man ni Betita nga bangud sa ginapangatubang nga pandemiya ang rasun kun ngaa mahina ang pagparehistro sa COMELEC.
Samtang ginpatpat ni Betita nga sarang makapadulong ang isa ka indibidwal sa talatapan sang COMELEC kun may yara sang mga palamangkutanon natuhoy sa pagparehistro.
Ginpasalig ni Betita wala sang dapat kabalak-an ang mga luyag magparehistro bangud hugot nga ginapatuman ang mga minimum health protocols agud malikawan ang paglapta sang virus.
