Maayo nga balita para sa mga regular nga emplyado sang kapitolyo probinsiya.
Malipayon nga ginpakigbahin sang provincial budget officer ang good news para sa mga regular nga empleyado sang kapitolyo probinsiyal matapos gin-aprubahan na sang Sangguniang Panlalawigan ang Performance-Based Bonus (PBB).
Ginpahayag ni Mr. Antonio Arbis, nga sarang na nga mabaton sang mga regular nga empleyado sang provincial capitol ang ila PBB sa una nga semana sini nga bulan sang Hulyo.
Suno kay Arbis nga ginba-se ang rating sang empleyado sa Good, Better kag Best performance nga ila ginpakita sa diin kun may yara sang Good performance sarang makabaton sang 50 porsyento sang ila isa ka bulan nga sweldo ang empleyado, kun Better naman 57.5 porsyento kag kun Best naman 65 porsyento ang PBB nga ila mabaton.
Ginpatigayon ang nasambit nga evaluation of performance sang tuig 2020 kag may duha ka rating period humalin sang Enero-Hunyo kag Hulyo-Disyembre 2020.
Nahibaluan nga duha ka mga departamento sa kapitolyo ang nakaangkon sang Best Performance kag magabaton sila sang 65% nga PBB sa ila isa ka bulan nga sweldo.
Kalakip diri ang Budget Office kag Human Resource Department.
Samtang may P15.5 million nga pondo nga ginpa-in para sa PBB sang 1,080 nga regular employees sang kapitolyo.
