Nagahanda na ang Barangay Officials sang Barangay Banica Roxas City, bangud sa ginapaabot nga rehabilitation sang taytay nga pagapatigayon sang Department of Public Works and Highways (DPWH).
Ini matapos ginhiwat ang konsultasyon upod sa mga residente nga posible maapektuhan sang proyekto.
Sa interview sang Bombo Radyo kay Punong Barangay Mike Xander Agrasada, iya ginpahayag nga nagkadto ang mga katapo sang DPWH sa ila barangay sang nagligad nga bulan sang Enero agud ipahibalo ang plano nga pag-rehabilitate sang taytay.
Ginhingyo man sang ahensya ang bulig sang barangay agud mapatuman ang konsultasyon sa mga pumuluyo, kun sa diin ginpahayag ang mga detalye sang proyekto kag ginbaton man ang ila mga opinyon kag concerns.
Dugang pa sang natungdan, ang amo nga tikang ang kabahin sang preparasyon agud masiguro ang hapsay nga implementasyon sang proyekto kag malikawan ang posible nga problema sa komunidad.
