ROXAS CITY — Nagtalana na sang committee hearing ang Committee on Public Utilities sang Sangguniang Panlalawigan sang Capiz agud talakayon ang reklamo sang mga jeepney operators kag drivers sa banwa sang Dumalag batuk sa mga nagabiyahe nga mga ceres bus liners nga may ruta Tapaz – Roxas City Vice Versa.
Suno kay SP secretary Zoey Herrera, imbitaron sang komitiba nga ginapamunuan ni Board Member Jonathan Besa ang mga katapo sang Dumalag Jeepney Operators and Drivers Association ukon DJODA, tagdumalahan sang mga kumpanya sang bus nga may ruta sa banwa kag ang Land Trasportation Franchising and Regulatory Board sa Marso 7, adlaw sang Martes agud matalakay ang isyu.
Bukas man suno kay Herrera ang hearing para sa iban pa nga mga grupo sang mga jeepney drivers kag operators nga may kasubong man nga problema may kaangtanan sa pagsulod sang mga bus liners sa ila ruta.
Mahibaluan nga nagpadala sang petisyon ang DJODA sa sanggunian batuk sa mga nagabiyahe nga ceres bus liners sa ila ruta nga suno sa ila ang nagapatay sa ila palangabuhian bangud nagakawad-an na sila sang mga pasahero.
Luyag man nila nga mausisa sang sanggunian sa LTFRB kun pila tanan ka mga units sang ceres bus ang ginhatagan sang pahanugot sang ahensiya nga makabiyahe sa nasambit nga ruta.
