PONTEVEDRA, CAPIZ – Ginsabat sang alkalde sang Pontevedra ang reklamo sang pila ka mga punong barangay sang amo nga banwa angut sa wala pagpakig-angut sa ila sang LGU sa cash for work program sang Department of Social Welfare and Development (DSWD).
Ginpahayag ni Mayor Esteban Contreras nga ginsunod lamang sini ang nasaad sa direktiba nga gikan sa Regional Director sang DSWD Region 6.
Klaro suno sa opisyal nga wala nabutang sa direktiba ni Director Ma. Evelyn Macapobre nga kinahanglan i-tap ang mga barangay kapitan para sa implementasyon sang cash for work program sang ahensiya.
Ang nasaad diri kag ginsunod ni Mayor Contreras amo nga may yara lamang sang focal person, municipal social welfare and development officer kag municipal disaster risk reduction and management officer.
Apang wala ginmentionar nga kinahanglan i-entregar ang program sa mga barangay kapitan.
Suno kay Mayor Contreras nga indi ini apektado kun may nagareklamo nga mga kapitan, bangud ang sa iya lamang amo ang pagtuman sa pagsulundan.
Apang wala nalikawan nga napalayag sang alkalde nga sadto may kasubong nga programa ang duha ka mga kongresista sang probinsiya sang Capiz nga wala man ginkoordinar sa iya ang implementasyon sini.
