ROXAS CITY – Gin-dismiss sang Roxas City council ang reklamo nga ginpasaka ni Punong Barangay Romeo Doloso sang Barangay Liong batuk sa ila Sangguniang Kabataan (SK) Chairman nga si Herra Huecas.
Ini ang ginkompirmar mismo ni City Councilor Albert Gregory Potato, chairman sang Committee on Good Governance sang Sangguniang Panlungsod sang mainterview sang Bombo Radyo.
Suno kay Potato nga ang ila pag-dismiss sang ginpasaka nga reklamo ni Doloso batuk sa ila SK chairperson ang kasunod sang pagsumiter ni Huecas sang iya nga resignation letter sa Office of the Mayor.
Ginpahayag ni Potato nga natalana na kuntani sila nga magpaguha sang desisyon natuhoy sa reklamo ni Doloso apang sadtong Enero 27, 2020, nagsumiter sang iya nga ‘irrevocable’ resignation letter si Huecas sa talatapan sang alkalde sang siyudad.
Nasaad sa sulat nga ginpadala ni Huecas nga epektibo sadtong Pebrero 3, 2020, magapanaog na ila sa posisyon bilang SK-chairperson sa pihak sang iya kagustuhan nga makaserbisyo sa ila barangay.
Ginpahayag ni Huecas sa sulat nga magatutok ini sa iya nga pag-eskwela kag ginpasalamatan man sini ang alkalde sang siyudad sa oportunidad kag pagsalig sa iya nga makaserbisyo.
Aminado si Potato nga wala nila ginalauman ang pag-resign ni Huecas bangud nagapaabot sila nga depensahan sini ang iya kaugalingon sa konseho.
Mahibaluan nga gindangop ni Doloso ang reklamo sini sa konseho sang siyudad bangud sang kapaslawan ni Huecas nga makapakita kag magtambong sa ila ginapatigayon nga sessions sa sulod sang halos pila ka bulan kasunod sang iya pagpadulong sa pungsod Japan para sa iya pagtuon.
Ginpanindugan ni Doloso sa iya reklamo nga ang wala pagpakita ni Huecas ang ‘ground’ agud mapahalin ini sa pwesto sandig sa Section 18 sang Republic Act 10742 ukon SK Reform Act.
