Renovation sa munisipyo kag merkado sa banwa sang Dumalag, suguran na sa bulan sang Marso

ROXAS CITY – Posible nga sa masunod nga bulan sang Marso suguran na ang renovation sa merkado kag munisipyo sa banwa sang Dumalag.

Ginpahayag ni Mayor Amado Eriberto Castro nga madugay na ang plano nga kaayuhon ang merkado kag munisipyo bangud nagasulod ang tubig kun magbubo ang ulan.

Ginkumpirma man sang alkalde ang bulig nga ginhatag ni Capiz 2^nd District Congressman Fredinil ‘’Oto’’ Castro nga naghimo sang inisyatibo agud mahatagan sang katumanan ang madugay na nga plano nga mapakaayo ang nasambit nga mga edipisyo.

Pinaagi sa inisyatibo ni Congressman Castro nga nagpangayo man sang bulig sa mga national agencies, natigayon nga makatipon sang pondo para masuguran ang renovation sang merkado kag municipal hall sa bulan sang Marso.

Nahibaluan nga ginpa-inan sang pondo nga P250 milyones ang konstruksyon sang municipal hall samtang P210 milyones naman sa merkado.

Samtang kalakip sa pagakadtuan sang 20% development fund sang banwa sang Dumalag sini nga 2020 amo ang proposal sang magkatuhay nga mga infrastructure project sa mga barangay.