Gintawag sang House prosecution panel spokesperson kag Lanao del Sur Representative Zia Alonto Adiong nga “ironic” ang pahayag ni Vice President Sara Duterte nga nahadlok siya para sa iya seguridad kag safety sang iya pamilya.
Suno kay Adiong, indi compatible ang nasambit nga pahayag bangud mismo si Duterte ang nagapangatubang sang tatlo ka kaso sang grave threats may kaangtanan sa iya mga pahayag sa tuig 2024 angot sa ginaalegar plano nga patyon sanday President Ferdinand Marcos Jr., First Lady Liza Araneta-Marcos kag anay House Speaker Martin Romualdez.
Nahibaluan nga nagpiyansa si Duterte sang P360,000 sa korte sang Quezon City matapos ginpasakaan sang kaso kag ginpirmahan ang arrest warrant.
Antes magsulod sa korte, ginpahayag ni Duterte nga wala siya nagasalig sa kapulisan kag madugay na siya nga naga-eksperyensya sang kakulang sang seguridad bangud sa gina-alegar pagpang-harass sa iya pamilya.
Samtang, ginpahayag sang Philippine National Police nga wala pa sila sang may nabaton nga report angut sa ano man nga pamahog batok kay Duterte ukon sa iya pamilya, apang padayon ang ila pagmonitor sa sitwasyon agud masiguro ang ila seguridad.
