Ginkumpirma ni National Bureau of Investigation (NBI) Director Atty. Melvin Matibag nga pasakaan sang kaso nga qualified human trafficking si Batangas 1st District Rep. Leandro Leviste kag iban pa nga mga indibidwal angut sa ginaalegar “honeytrap” nga plano batok kay Executive Secretary Ralph Recto.
Suno kay Matibag, pormal nga ginpasaka ang reklamo sa National Prosecution Service sang Department of Justice.
Ang kaso ang nag-ugat sa entrapment operation sang NBI kun sa diin nadakpan ang isa ka talent manager kag na-rescue ang pila ka mga babaye nga ginpahayag gintanyagan sang daku nga kantidad agud mag-intra sa plano nga magpagwa sang himu-himu nga alegasyon batuk kay Recto.
Una nga ginpatawag sang NBI sanday Leviste kag anay Negros Oriental Rep. Jacinto “Jing” Paras para sa imbestigasyon. Ginpanginwala ni Leviste ang iya kahilabtanan kag ginpanindugan sang iya abogado ang iya kinamatarong nga maghipos.
