Nagpahayag sang pagkahangawa si Batangas 2nd District Rep. Gerville “Jinky Bitrics” Luistro ang posible nga pagmaniobra sang dumuluong sa National Grid Corporation of the Philippines (NGCP) bangud ginapahayag nga may yara sini mga opisyal nga Chinese nationals.
Sa ginpatigayon nga pagsinapol sang House Committee on Legislative Franchises, ginusisa ni Luistro ang pagsunod sang NGCP sa probisyon sang konstitusyon nga nagasiling kinahanglan 60% nga panag-iyahan sang mga Pilipino kag mga Pilipino lamang ang mahimo nga magtalana sa executive position kag pagdumala sang kompanya.
Ginhalimbawa ni Luistro ang mga ebidensya nga nagikan sa mga rekord sang NGCP, kalakip na ang General Information Sheet (GIS), kung sa diin ang mga Chinese ang yara sa importante nga posisyon kaangay sang Chairman of the Board, subong man ang partisipasyon sang NARI Group Corporation, isa ka Chinese IT infrastructure provider, sa operasyon sang NGCP.
Suno sa mamalidha, ang prisensya sang mga dumuluong sa importante nga posisyon sang ahensya indi lamang nagakontra sa tinutuyo sang constitutional safeguards kundi nagabukas man sang pagduda kung sin-o ayhan ang may kontrol sa operasyon sang power grid.
Samtang, ginsiling naman sang opisyal sang NGCP nga si Pia San Diego sa komite nga nagasunod ang kompanya sa constitutional requirement, kag ginasiguro nga ang tanan nga opisyal sa executive kag managerial positions lunsay mga Filipino.
Wala man ginpasugtan ni Luistro ang pahayag sang opisyal sabaylo ginsiling sini nga ang posisyon kaangay sang Chairman of the Board, Chief Technical Officer, kag evaluators of bids klaro nga kabahin sang managerial roles.
Pahayag naman ni San Diego nga ang Chairman wala ginakabig isa ka executive official.
Mahibaluan nga base sa 2024 GIS sang NGCP, nagaguha nga si Zhu Guangchao, ang Chairman of the Board isa ka Chinese national.
Ginsambit man sang kongresista ang pila pa ka mga opisyal sang NGCP nga lunsay mga Chinese kung sa diin ini amu sanday Liu Zhaoquiang, ang Assistant Chief Technical Officer, kag Liu Xinhua, ang Chairman of the Board Audit Committee.
Ginpakita man sini ang dugang nga mga record nga nagasiling si Wen Bo, nga ginatumod bilang Chief Technical Officer kag isa ka Chinese.
Ang pagsinapol ang kabahin sang isa ka motu proprio nga imbestigasyon may kaangtanan sa pagsunod sang NGCP sa iya legislative franchise sa idalum sang Republic Act (RA) No. 9511.
Ginaimbestigahan man sang mga mamalidha kung ang NGCP, nagasunod sa mga kinahanglanon sang konstitusyon may kaangtanan sa pagdumala sang mga dumuong sa mga public utilities.
