Nagpanawagan si Rep. Brian Poe sang mas mabaskog nga pag-usisa sa pagpatuman sang mga nagapadayon nga school safety laws kasunod sang trahedya nga pagpaniro sa isa ka eskwelahan sa Tacloban City nga nagresulta sa pagkapatay sang tatlo ka estudyante kag pagkasamad sang madamo pa.
Bangud sini, nagsumiter si Poe sang House Resolution No. 1147 nga nagaduso sang imbestigasyon agud mahibaluan kon epektibo gid man ang pagpatuman sang mga balaod kag programa nga nagapanalipod sa seguridad kag kaayuhan sang mga estudyante sa mga eskwelahan.
Sakop sang imbestigasyon ang implementasyon sang Anti-Bullying Act, mga emergency response protocol, mental health programs para sa mga estudyante, kag ang nagapadayon nga juvenile justice system. Suno kay Poe, indi kakulangan sang balaod ang problema kundi ang husto kag seryoso nga pagpatuman sini.
Ginpabutyag man sang mambabatas nga dapat usisaon kun paano nakaangkon sang armas ang mga menor de edad kag kun sin-o ang posible nga may responsibilidad sa pagbayaan ukon kakulangan sang pagbantay sini.
Sa pihak nga bahin, ginpasidunggan niya ang 15-anyos nga si Chris Lorenz Fabian bangud sa iya ginpakita nga kaisog sa pagpanalipod sa iya mga kaupdanan sang natabo ang insidente. Para kay Poe, dapat ini nga mangin inspirasyon kag paandam sa gobyerno kag sektor sang edukasyon nga palig-unon pa gid ang mga pamaagi para masiguro ang kaluwasan sang kabataan sa sulod sang mga eskwelahan.
Nanawagan man siya sa mga kinauukulan nga himuon nga leksyon ang natabo agud mapauswag pa ang mga programa kag polisiya nga nagaproteher sa mga estudyante sa bug-os nga pungsod.
