Nagpabutyag sang mabaskog nga pagsalig si Bicol Saro Partylist Representative Terry Ridon nga may bastante kag mabug-at nga basehan agud maipasaka sa Senado ang impeachment complaint batok kay Vice President Sara Duterte, ilabi na sa ₱6.7 billion bank transactions nga natukiban kag ang mga pamahog sa kabuhi ni President Ferdinand Marcos Jr.
Suno kay Ridon, ang daku nga kantidad sang kwarta nga nagasulod kag nagagwa sa mga bank accounts nga may kaangtanan Kay VP Sara kag sa iya bana nga si Atty. Mans Carpio, sa nagligad nga pila ka tuig isa ka tuman ka mabakod nga basehan.
Magluwas sa makaduluda nga paghulag sang kwarta, ginhatagan pagtamod ni Ridon nga nagpakita na sang klaro nga probable cause batok kay Duterte ang mga nagligad nga hearing sa isyu sang confidential funds.
Samtang, sa hearing nga natalana sa Abril 29, ginalauman nga magadesisyon ang komitiba kun buksan ang mga dokumento sang Bureau of Internal Revenue (BIR) may kaangtanan sa kaso.
Para kay Ridon, bisan wala sang dugang nga ebidensya, bastante na ang pahayag ni VP Sara.
Agud pormal nga maipasaka ang kaso sa Senado, kinahanglan lang nga makuha ang majority vote nga 21 sa 39 ka mga miyembro sang House Committee on Justice.
