ROXAS CITY – Posible nga may mga ‘special interest’ ang pila ka mga kongresista sa tuyo nga pagpahalin kay House Speaker Alan Peter Cayetano bilang pinuno sang Manubo nga Panalgan sang Kongreso.
Ini ang ginpahayag ni Capiz 1st district Congressman Emmanuel ‘Tawi’ Billones Sr. sang mainterview sang Bombo Radyo Roxas.
Partikular nga gintumod sang kongresista sanday Representatives Isidro Ungab kag Doy Leachon nga posible may yara sang espesyal nga handom sa tion nga mapahalin si Cayetano sa posisyon kag suportahan si Representative Lord Allan Velasco bilang bag-o nga House Speaker.
Nagapati naman si Billones nga may mga indibidwal sa likod nanday Velasco kag Cayetano nga may tagsa-tagsa ka personal nga interes rason nga nagresulta ini sa kudeta sa Kamara agud pahalinon si Cayetano.
Mahibaluan nga may yara sang term sharing agreement sanday Cayetano kag Velasco bilang House Speaker.
Sa nasambit nga kasugtanan, una nga magapungko bilang House Speaker si Cayetano sa sulod sang 15 ka bulan samtang magabulos diri si Velasco sa sulod sang masunod nga 21 ka bulan.
