Ginpabutyag sang isa ka legal experto ang importansya sang Republic Act No. 6552 ukon Maceda Law, isa ka layi nga nagahatag sang proteksyon sa mga nagabakal sang real estate paagi sa installment payment.
Sa interview sang Bombo Radyo kay Atty. April Rose T. Villanueva, sang Integrated bar of the Philippines-Capiz Chapter, iya ginpahayag nga ang katuyuan sang Maceda Law amo ang paglikaw sa indi makatarungan nga pagkadula sang mga nabayad sang buyer kag sa mga kondisyon sa kontrata.
Sakop sang ini nga layi ang mga nagabakal sang residential lots, balay kag condominium units paagi sa installment, apang wala ini nagalakip sa mga industrial kag commercial properties kag sa mga transaksyon nga ginapasakop sang iban nga espesyal nga layi.
Suno sa abogado, ang buyer nga nakabayad na sang duha ka tuig ukon labaw pa nga installment may kinamatarong sa grace period kag mahimo man makabaton sang cash surrender value kon kanselahon ang kontrata, samtang ang seller kinahanglan magsunod sa legal nga proseso antes mahimo nga kanselahon ang kasugtanan.
Nagalakip ini sang paghatag sang notarized notice of cancellation kag pagtuman sang ginapatuman nga polisa sang layi.
Dugang pa sang natungdan, ang Maceda Law nagabulig sa pagbalanse sang interes sang buyer kag sang developer pinaagi sa paghatag sang patas nga proteksyon sa tagsa ka partido. Gin-aghat man niya ang publiko nga hibaluon ang ila mga kinamatarong kag obligasyon antes magsulod sa bisan ano nga real estate transaction agud malikawan ang legal nga problema sa ulihi.
