Ginpanindugan ni House prosecutor nga si Atty. Chel Diokno nga katuyuan sang ila request for admission amo nga mangin matalunsay kag madasig ang proceedings sa impeachment case ni Vice President Sara Duterte.
Sa ika-30 nga adlaw sang impeachment trial, ginpahayag ni Diokno nga luyag nila mahibaluan kon diin sa mga isyu ang matuod nga ginabaisan agud nga wala na sang tion nga mausik sa mga bagay nga wala ginakontra sang defence side.
Lakip sa mga dokumento nga luyag nila klaruhon amo ang pila ka bank records nga direkta nga ginsumiter sang mga bangko sa impeachment court bilang sabat sa mga subpoena.
Suno kay Diokno, katuyuan sang amo nga pangabay indi nga piliton si Bise Presidente Duterte nga akuon ang responsibilidad kundi agud nga mapalip-ot ang mga isyu nga pagadebatehan kag malikawan ang pagpakita sang mga testigo nga mahimo indi kinahanglan.
