ROXAS CITY – Wala gin-aprubahan sang Sangguniang Panlalawigan ang request sang realignment of fund ni Capiz Governor Esteban Evan ‘Nonoy’ Contreras para gamiton para sa coronavirus disease (COVID-19) operation.
Mahibaluan nga ang nasambit nga request ang nagalab-ot sa 16 milyones pesos nga kuhaon sa 70 porsyento sang Calamity Fund sang probinsiya nga nagalab-ot sa 66 milyones pesos.
Ginapahayag nga naubos na ang kapin sa 28 milyones pesos nga Quick Response Fund sang probinsiya.
Mahibaluan nga ginpanghatagan sang gobernador sang tag-P1 milyon ang mga kabanwahanan, P100, 000 ang gin-alokar para sa mga frontliners kag tag-P5, 000 naman sa mga kabaranggayan.
Panugyan sang Sanggunian nga indi pagtandugon ang pondo para sa pagpakaayo sang mga dalan pananglitan may mag-igu nga kalamidad sa probinsiya kag mas maayo nga kuhaon na lamang ini sa pondo nga ginpain para sa seminars kag mga aktibidad sang gobyerno-probinsiyal.
