ROXAS CITY – Gin-endorso na sa Land Transportation Office (LTO) Region-VI kag nagahulat nalang kun aprubahan sang ahensya ang hinyo sang Roxas City government nga pagpaidalom sa paghanas ang katapo sang Traffic Management Unit (TMU) kag Roxas City PNP agud mangin deputized agents sang LTO.
Ini ang ginkumpirmar ni Maria Lourdes Casipe, pinuno sang LTO-Roxas, sang mainterview sang Bombo Radyo.
Suno diri, sa iya pagkahibalo, duha lamang ang numero nga gina-aprubahan sang ila ahensya para sa deputation sa kada LGU, apang pagalantawon sang ila Operations divisions sang Regional office ang ginpadala nga sulat ni Mayor Ronnie Dadivas nga nagahinyo sang training kag seminar sa mga TMU kag PNP personnel agud mangin deputized agents.
Agud mangin deputize agents sang LTO, ginpahayag ni Casipe nga pila sa rekisitos amu nga dapat regular nga empleyado nga may permanente nga posisyon sa gobyerno kag mapasaran ang psychological exam kag written examination.
Nahibaluan nga may yara sang deputize agent sa Capiz kag ini ang katapo sang Highway Patrol Group (HPG).
Matandaan nga ba-se sa joint memorandum circular sang DILG kag DOTr, mahimo makapangdakop kag maka-issue sang citation ticket ang LGU, apang ang deputized LTO agent lamang ang maka-kumpiskar sang driver’s license.
