ROXAS CITY – Nagdepensa ang pinuno sang Roxas City Environmental and Sanitation Enforcement Team (RESET) sa reklamo nga ginpalab-ot sang concerned citizen sa talatapan sang alkalde sang syudad.
Una nga ginsabat ni retired police col. Primo Golinggay ang pagdakup sa wala nagasuksok sang face mask nga concerned citizen samtang yara ini sa Teodoro Arcenas Trade Center (TATC).
Suno kay Golinggay nga bisan yara sa sulod sang salakyan ang tagreklamo nga wala nagasuksok sang face mask, apang bukas ang bintana sang iya nga salakyan kag may risgo nga matapnan sang COVID-19.
Ginapanindugan sini nga ginapatuman lamang nila ang safety protocols agud indi maglapta ang amo nga balatian sa merkado publiko, bangud sila ang ginasaligan sang alkalde nga magpatuman sang amo nga pagsulundan sa TATC.
Pag-abot naman sa isyu nga wala nasunod ang social distancing sang ginpasakay ang tanan nga nadakpan nga wala nagasuksok sang face mask sa patrol car sang pulisya, ginpahayag ni Golinggay nga kinahanglan pa sini nga i-verify ang reklamo kag hibaluon ang natabo, bangud sila sa RESET matapos nga madakpan ang mga violators kag matugyan sa kapulisan, gilayon na sila nga nagalakat.
Nagapati ini kun may kinahanglan nga pamangkuton kun ano ang proseso sa pagpasakay kag pagdul-ong sa mga violator sa crisis center, ang makahatag sang pat-ud nga sabat ang mga pulis.
Samtang ginpabugal ni Golinggay nga 95 porsyento sang mga vendors nga yara sa TATC ang compliant sa pagsuksok sang face mask kag ang 5 porsyento nga salawayon sa health protocols ang iban nga bumalakal nga ginabalewala lamang ang pagsulundan.
