ROXAS CITY – Dugang nga 13 ka depektibo nga kiluhan ang ginkumpiskar sang mga katapu sang Roxas City Environmental Sanitation and Enforcement Team (RESET) sa pagpanguna sang team leader nga si Retired Col. Primo Golingay sa Teodoro Arcenas Trade Center (TATC).
Ginpahayag ni Golingay nga nakumpiskar ang nasambit nga kiluhan kasunod sang ginpatigayon nga inspeksyon sang hubon sa merkado publiko.
Nakuha ang depektibo nga mga kiluhan sa mga vendors nga wala sang permanente nga mga pwesto sa TATC.
Suno sa opisyal nga ginahimo nila ang inspeksyon bilang pagtuman sa consumer protection program ni Mayor Ronnie Dadivas nga luyag amligan kag proteksyunan ang mga bumalakal batuk sa mga manughingalit nga mga vendors kag mapasiguro ang patas nga pagnegosyo sang mga negosyante.
Matandaan nga sang damlag lang may kapin sa 23 ka mga depektibo nga kiluhan sa TATC ang nakumpiskar sang RESET.
