ROXAS CITY – Nagapanindugan ang Roxas City Environmental Sanitation Enforcement Team (RESET) nga nagatrabaho lamang sila sang ensakto kag nagapatuman sang mga pagsulundan sandig sa ordinansa sang siyudad sa Teodoro Arcenas Trade Center (TATC).
Ini ang ginpahayag ni Marcial Gaya-gaya, RESET member, sang mainterview sang Bombo Radyo.
Ini ang kasunod sang petisyon sang mga manugbaligya sa amo nga merkado-publiko nga nagatuyo nga mapahalin ang apat ka miyembro sang RESET nga ginalakipan nanday Gaya-gaya, team leader sang grupo nga si Primo Golingay, Efren Diaz kag Lemuel Bodegas.
Suno kay Gaya-gaya nga kuntani binag-binagon sang mga manugbaligya kun sin-o sa ila ang abusador bangud madugay na nga ginpahangop ang mga vendors natuhoy sa pagsulundan apang madamo sa gihapon ang nagapakatig-a kag wala nagasunod.
Ginpanindugan sini nga ginmanduan sila sang alkalde nga ihatag sa mga motorista ang karsada kag ipagamit sa mga manugbakal ang mga sidewalk kag indi paghimuon nga plastaran sang mga manugbaligya.
Dugang pa diri nga ginmanduan man sila nga i-organisar sang ensaktor ang mga vendors kun sa diin ang ila nagakadapat nga pwesto.
Suno pa diri nga wala man sila nagakulang sa konsiderasyon bangud ginahatagan man ang mga vendors sang oras agud makalatag sang ila baligya apang may gindesignar lamang nga oras.
Wala man suno sa iya sang kamatuoran nga nagapangsinggit sila bangud ila lamang nga ginasita ang mga vendors nga wala nagasunod sa pagsulundan kag sa pagkamatuod suno sa iya, ang mga manugbaligya pa ang nagapangisog sa ila.
Bukas man suno sa iya ang ila nga talatapan para sa mga vendors luyag magpalab-ot sang reklamo.
Nagapati naman si Gaya-gaya nga may nagasutsot sa mga manugbaligya agud masamad ang imahe sang ila nga grupo.
Gintawag naman sang manugbaligya nga si Manang Gina nga butigon si Gaya-gaya.
Suno diri nga kun mag-atubang man sila sa talatapan sang RESET, wala man ang mga ini ginapamatian bangud ginasing-alan sila ni sang team leader sang grupo nga si Golingay.
Dugang pa sini nga alegasyon nga sang nakakompiskar sang mga isda ang grupo gikan sa mga fish vendor, wala sang kamatuoran nga ila ini ginhaboy sa suba bangud suno sa iya may nakakita nga ginsumsuman ini sang mga taga-RESET sang sila ang nag-inom.
