ROXAS CITY – Ginkompirmar sang isa ka residente sang Barangay Bato, Roxas City nga may yara sang natabo nga operasyon ang mga kapulisan sang nakaligad nga Pebrero 27, 2020 kun sa diin ginpangdakop ang mga nagapatigayon sang drag-racing ukon palumbaanay sa amo nga lugar.
Suno kay alyas John, indi na sang bag-o sa ila ang pagpatigayon sang palumbaanay sang motorsiklo sa ila lugar bangud madugay na ini nga ginahimo diri.
Suno sa iya nga sadtong Pebrero 27, pauli na kuntani siya gikan sa iya trabaho sang nakit-an mismo sini ang pagpangdakop sang mga kapulisan sa mga nagapatigayon sang ilegal nga aktibidad sa amo nga lugar.
Ginpahayag pa sini nga masobra sa lima ka mga indibidwal ang nagkaladakpan kun sa diin ang iban sa ila ang mga menor-de-edad.
Apang suno kay John nga gin-refer lamang sang mga kapulisan sa mga traffic auxiliaries ang nadakpan nga mga persona kag ginpaticketan.
Samtang, ginkompirmar naman ni Traffic Management Unit (TMU) Head Gonzalo Andrada nga gilayon sila nagpadulong sa lugar matapos gintawagan kag gin-impormar natuhoy sa nasambit nga operasyon.
Dako man ang pagpasalamat sang talatapan sa amo nga operasyon sang mga kapulisan bangud dapat na ini nga tapnaon suno kay Andrada bangud magluwas sa ilegal ini, ginatunaan pa ini sang mga aksidente.
Suno kay Andrada nga gintugyan nila sa Women and Children Protection’s Desk sang Roxas City Police Station ang nagkaladakpan bangud lunsay ini menor-de-edad.
