ROXAS CITY – Nagpalab-ot sang reklamo ang pila ka mga residente nga nagaistar sa National Housing Unit sang NHA bangud sa masami nga pagbaha sa Barangay Rizal, Pontevedra, Capiz.
Suno sa mga residente nga masami nga ginabaha ang ila lugar sa tagsa ka magbubo ang mabaskog nga ulan kag nagalab-ot pa sa hawak ang tubig baha.
Ginalantaw nga posible rason sang mga residente nga nagaistar sa mga housing unit amo ang kakulangan sang drainage system kun sa diin wala sang bulhugan ang tubig kag nagaresulta sang masami nga pagbaha.
Base naman sa pahayag sang alkalde sang amo nga banwa nga si Mayor Esteban Dodoy Contreras nga ginpalab-ot na sini ang amo nga problema sa opisina sang Municipal Engineers Office.
Samtang, nagahinyo naman ang mga residente nga kun mahimo hatagan sang igtalupangod sang lokal nga gobyerno sang amo nga banwa ang nasambit nga problema.
