PANITAN, CAPIZ – Nagaantos sa pagbaha ang pila ka mga residente sa Barangay Balatucan, Panitan, Capiz bangud sang wasak nga flood control project sa amo nga lugar.
Sa interview sang Bombo Radyo Roxas kay Norma Dili, residente sang nasambit nga barangay, iya ginpahayag nga nagakaapektohan sila sa pang-adlaw-adlaw nila nga pangabuhi bangud sa nasambit nga proyekto.
Suno kay Dili, tungod sa gin-obra nga riprap, nagkalaguba ang ila puluy-an kag ginpang-anod ang pila ka mga gamit matapos magbaha.
Dugang pa sang natungdan, kada magbaha nagalab-ot ang tubig tubtob sa bubong sang ila balay kag may ginasupreher pa ini nga balatian rasun nga ini ang nabudlayan sa ila nga pagpangabuhi.
Nahibaluan nga nagsugod ang flood control project Lima na ka tuig ang nakaligad, apang subong wasak na ini kag wala pa ma-repair tubtob subong nga tuig.
Pahayag pa niya, tuman ang kahadlok niya bangud basi marumpag na ini kag maguba pa sini ang iya nga puluy-an kon indi ini makay-o gilayon.
Dugang pa sini, indi niya mabasol ang ila barangay officials bangud wala sang nagaka-igo nga budget para sa pagkay-o sang nasambit nga riprap.
Nagpangabay man ini sa kontraktor nga nagadumala sa proyekto nga kay-uhon liwat ang ila pag-obra agud indi na ini makaperwisyo sa ila lugar kag sa pila ka mga pumuluyo.
Interviewed by: Bombo Francis Biñas
