ROXAS CITY – Ginkumpirmar sang Acting Municipal Agriculturist sa banwa sang Maayon nga nagikan sa Barangay Canapian, ang apat ka blood samples sang baboy nga nagpositibo sa African Swine Fever (ASF), sandig sa ginpaguwa nga abiso sang Department of Agriculture-Western Visayas.
Sa interview sang Bombo Radyo kay Ms. Evie Dizon, ginsiling sini nga ginpatigayon ang blood samples, matapos ang pagpahibalo sang Brgy. Kapitan sang amu nga barangay, nga may mga baboy sa ila lugar nga nagkalamatay.
Sa pagpangusisa sang taga munisipyo, nahibaluan nga nagbakal sang karne sang baboy ang taga-Canapian, sa Sara, Iloilo bangud ginpahayag sang residente nga barato ang ila nga baligya.
Sa karon, bilang lihok nga ipatuman, may apat ka adlaw nga pagabawalan nga magkatay ukon magbaligya kag indi magbaton sa ila merkado sang mga baboy nagikan sa 12 ka mga upland barangays nga malapit sa Brgy. Canapian.
Ginmanduan man ang Brgy. Officials sang Canapian kag kaiping nga barangay nga magpatigayon sang checkpoint sa nagaguwa-pasulod sa ila lugar.
Samtang, ang slaughterhouse sa ila banwa ang magapangayo sang certification sa barangay nga magapamatuod nga wala sang sakit ukon wala sang sintomas sang ASF ang pagakatayon nga baboy.
Nahibaluan nga sa anum ka mga samples, apat diri ang nagpositibo sa ASF nga sang ulihi napatay kag ginlubong, kag ang duha naman ang nagikan sa kaiping nga barangay nga nagnegatibo sa ASF.
