Resilience kag consistency ang nangin liyabi sang isa ka pulis sa madinalag-on nga pagkapasar sa bar exam 2025.
Sa interview sang Bombo Radyo kay Police Staff Sergeant Junette Mae Bernada nga tumandok sang Barangay Dinginan, Roxas City, iya ginpahayag nga wala gid niya gina-ekspektar ang iya nga pagkapasar bangud limitado lang ang panahon sang iya preparasyon para sa amo nga pasinawan.
Suno kay Police Staff Sergeant Bernada, indi ini ang una nga beses nga nag-take siya sang bar exam bangud makaduha na ka beses ini nga nagtinguha nga magkuha apang bangud sa masako nga schedule kag problema sa iya sini nga ikaayong-lawas, makaduha man ka beses ini nga napaslawan.
Kag sa iya pangatlo nga pagkuha sang exam, natigayon na niya nga makuha handum niya humalin pa sang bata siya nga mangin isa ka abogada.
Pahayag pa niya, ang suporta sang iya pamilya ilabi na ang iya amay nga nagtaliwan na, amo ang naghatag sang inspirasyon kag motibasyon sa iya agud nga ipadayon ang iya nga handum.
Nagpasalig man ang natungdan nga mangin isa siya ka ehemplo sa pagbulig proteher sang mga kinamatarong sang mga tawo nga nagakinahanglan, indi lang bilang pulis kundi isa man ka abogado.
