ROXAS CITY – Respeto sa kinamatarung sang isa ka tinuga!Ini karon ang ginahinyo sang miyembro sang LGBTQ sa syudad sang Roxas kag probinsiya sang Capiz sa publiko kasunod sang nangin kontrobersiyal nga isyu nga gindalahigan sang isa ka transgender woman nga gindumilian nga makasulod kag makagamit sa CR sang mga babaye sa isa ka mall sa Quezon City.
Ginpahayag ni Mr. Charlie Distor, fashion guru kag event coordinator sa Roxas City nga klaro sa naglapta nga video nga kuha sang nangin biktima nga si Gretchen Custodio Diez nga gintapakan ang kinamatarung, ginharass ini kag nahuy-an pa sa publiko sang yudyuron sang janitress kag ginhampak bangud sa iya video recording.
Suno kay Distor nga klaro man nga may diskriminasyon sa nasambit nga mall sa diin nagaguwa nga wala sila sang lugar sa sosyudad.
Dapat maintiendihan sang publiko ang sakripisyo nga ila naagyan sa mga judgemental nga tawo nga kun tratuhon sila kasubong nga wala sang kaayuhan nga madala sa komunidad.
Apang suno kay Distor kun palaparon lamang sang iban ang ila kaisipan, makita nga madamo nga mga miyembro sang LGBTQ ang asensado ang kabuhi bangud sa ila talento kag kaalam
Pila man sa ila ang nagaserbe nga breadwinner sang ila pamilya kag may nangin kontribusyon sa komunidad.
Ginpahayag pa ni Distor nga kun tan-awon mas mataas ang mga bading ukon agi bangud kumbinasyon ini sang duha ka tinuga nga amo ang lalaki kag babaye.
Samtang handum lamang sini nga kuntani may yara man sang home for the aged ang mga bading nga kasubong sa iya sa ila nga pagtigulang.
