Madamo sa gihapon nga mga pumuluyo ang nagapadulong kag nagapangamuyo sa tagsa nila ka mga himata nga nagtaliwan sa pihak nga kinabuhi sa Banica Catholic Cemetery sa Barangay Banica, Roxas City.
Sa interview sang Bombo Radyo kay Rev. Fr. Edsel Delfin- Rector sang Immaculate Conception Metropolitan Cathedral, ginpahayag sini kadungan sa pagsaulog sang all saints kag all souls day, naghiwat ini sang bendisyon sa mga lulubngan sa Banica Catholic Cemetery sa pagpanguna sang Arsobispo sang Capiz nga si Most Reverend Msgr. Victor B. Bendico.
Mensahe ni Father Delfin sa mga indibidwal nga nagapanguha sang kandila kag mga pagkabutang sa lugar, tani respetuhon man sang mga ini ang mga pinalangga ta nga mga nagtaliwan na, bangud ang lugar nga kasubong sang sementeryo isa ka sagrado nga dapat tahuron.
Ginapangabay man ni Father Delfin nga indi na maliwat kag indi na paghimuon ang mga iligal nga hilikuton bilang pagtahod sa mga nagtaliwan.
