Kada restaurant may yara sang secret ingredients nga ginagamit para makaganyat sang customer apang mapati ka bala kun ang isa ka award-winning fried chicken restaurant sa Japan nagagamit sang mantika nga masobra 60 ka tuig na nga wala naislan kag ini ang ginakabig nila nga secret ingredient.
Ang Wakatori restaurant, ginbuksan sang 1960 kag humalin sadto amo sa gihapon ang ginagamit nga mantika sa pagprito sang manok.
Suno kay Yoshihiro Tsuchiya, ang third-generation owner sang Wakatori, ang daan na nga mantika nagahatag sang manami nga aroma kag unique nga sabor sa ginprito nga manok nga indi makumparar sa sabor sang ginprito nga manok sa bag-o nga mantika.
Iban nagahambal nga delikado ang paggamit sang 66- anyos na nga mantika apang gin-athag sang Japanese award-winning eatery nga ang kalidad sang mantika ginamintinar paagi sa daily cleaning, filtering, kag pagdugang sang bag-o nga mantika.
