Ginkwestyon ni Senator-Judge Francis Escudero si former Commission on Audit (COA) Intelligence and Confidential Funds Audit Office auditor Atty. Roderick Wamil may kaangtanan sa Item 8.3 sang Joint Circular nga nagapatuman sang mga proseso sa paggamit kag pag-audit sang confidential funds.
Sa pagpangusisa ni Escudero, ginpamangkot niya si Wamil kun ang isa ka Audit Observation Memorandum (AOM) ukon obserbasyon sang auditor nagakahulugan bala nga may kapaltahan sa pag-liquidate sang pondo.
Ginpamatud-an ni Wamil nga ang isa ka AOM lamang ang wala nagakahulugan sang failure to liquidate.
Suno sa iya, wala man ini nagakatabo apisar pa nga may duha ukon madamo pa nga AOM, bangud ang failure to liquidate nagakatabo lamang kun mag-abot na sa Notice of Suspension.
“So hindi restitution ’yung pinag-uusapan natin dito. Demand to submit document,” pahayag ni Escudero.
Ginkumpirma ni Wamil ang amo nga punto kag ginpahayag nga ang restitution ukon pagbalik sang pondo nagasulod lamang kun magpagwa na ang COA sang Notice of Disallowance.
