ROXAS CITY – Negatibo ang nangin resulta sa ginpatigayon nga random drug test sa tanan nga kapulisan sa probinsya sang Capiz.
Ini ang ginkumpirmar ni PMaj. Ruby Magallanes Information Officer sang CPPO sang mainterview sang Bombo Radyo.
Suno kay Magallanes, yara sa kapin 1,205 ka mga kapulisan sa bug-os nga probinsya ang natigayon nga magpaidalum sa surprise drug test nga ginhiwat sadtong tinalikdan nga Hulyo 6 subong nga tuig.
Ang nasambit nga aktibidad ang natapos sa sulod lamang sang isa ka adlaw.
Dako man suno diri ang ila pagpasalamat sa nangin resulta sang amu nga test.
Buot silingon suno kay Magallanes, ginatipigan sang mga kapulisan ang ila katungdanan nga mangin isa ka maayo nga ehemplo sa katawhan.
Apang, pananglitan suno diri nga magpositibo ang isa ka pulis, magapangatubang ini sang nakaigo nga kaso kag mahimo nga mapahalin sa serbisyo.
Mensahe sini sa kaangay pulis, paminsaron ang tanan nga butang antes sudlon kag subong man ang kabudlayan nga naagyan antes nalab-ot ang ila handum nga magserbisyo sa publiko.
