ROXAS CITY – Onse na lamang gikan sa 30 ka mga patients under investigation ukon PUI’s nga nagpaidalom sa hospital quarantine ang ginahulat ang resulta sang specimen sample nga ginpadala sa Western Visayas Medical Center.
Suno kay Dr. Leah Del Rosario, Provincial Health Officer I nga sa 19 ka mga nagguwa na nga resulta, isa diri ang nagpositibo kag 18 ang nag negatibo sa COVID-19 kalakip na diri si patient 14 nga nauna na nga ginabawian sang kabuhi bangud sa congestive heart failure.
Magluwas sa 30 ka mga PUIs nga nagapaidalom sa hospital quarantine, ginkumpirmar man ni Dr. Del Rosario nga nga may yara pa sang 16 ka dugang nga PUIs nga nagpaidalom sa home quarantine.
Bangud nga nagapakita lamang sang mild symptoms ang mga yara sa home quarantine, ginpakamaayo na lamang nga indi na pagkuhaan ang mga ini sang specimen sample para ipaidalom sa testing.
Magluwas sa 30 ka mga PUIs nga nagpaidalom sa hospital quarantine kag 16 ka mga nagpaidalom sa home quarantine, may yara pa sang nagalab-ot sa 2,901 ka mga person under monitoring ukon PUMs nga ginamonitor ang Provincial Health Office.
Sa matandaan nga nakabalhag sang labing-una nga kaso sang COVID-19 ang probinsiya sang Capiz, matapos magpositibo sa Coronavirus disease 2019 ang 45 anyos nga lalaki nagikan sa barangay Lucero, Jamindan, Capiz kag nagatrabaho sa kapitolyo Probinsiyal kag nagaserbi nga staff sang isa ka board member.
Samtang, ginalauman naman sang PHO ang pagguwa sang resulta sang onse ka mga specimen sample nga ginpadala sa Western Visayas Medical Center sa masunod nga semana.
