Malipayon ang Philippine Red Cross (PRC) Capiz chapter sa resulta sang ginpatigayon nga Dugong Bombo 2021 kahapon sa diin partner sang Bombo Radyo Roxas ang Local Government Unit sang banwa sang Jamindan.
Ginpahayag ni Mr. Ray Martinez nga nangin madinalag-on ang nasambit nga bloodletting activity bangud madamo nga mga blood donors ang nagpadulong sa venue sang aktibidad kag boluntaryo nga nagpakuha sang dugo.
Suno kay Martinez nga importante ang dugo bangud makasugpon ini sang kabuhi sang pasyente nga nagakinahanglan sang dugo.
Ginakabig man nga Blood is Life, bangud indi mabuhi ang tawo kun wala sang dugo.
Ginpasalamatan man ni Martinez ang tanan nga sektor nga boluntaryo nga nagpakuha sang dugo.
Nahibaluan nga 96 ang successful blood donors kag may kapin sa 43,200 cc ukon 11.4 gallon ang natipon sa amo nga aktibidad.
Sa nasambit nga numero sang mga nagdonar sang ila dugo 28 diri ang Type A; 24 ang type B; 33 ang type O kag 11 sa type AB kag may walo ka mga gindefer bangud sa mataas nga blood pressure.
Ginklaro man ni Martinez nga ila ginasunod ang voluntary blood donation ukon boluntaryo nga pagdonar sang ila dugo sang mga donors.
Ang blood donation activity ginpasakupan sang pila ka mga organisasyon sa probinsiya kasubong sang Tau Gamma Phi Triskelion grand fraternity-Jamindan, kag mga Jamindahanon nga ginpakita ang ila suporta pinaagi sa pagdonar sang ila dugo.
Samtang memorable ang aktibidad kaina sang aga bangud natuon ini sa Blood Donors Month sang ahensiya.
Lauman ang dugang nga mga blood donation sa masunod nga mga inadlaw, agud makatipon sang dugo nga igabulig sa mga nagakinahanglan.
