ROXAS CITY – Kasubong nga nakuhaan sang tunok sa dughan ang provincial jail warden sang nagguwa na ang resulta sang imbestigasyon kag rekomendasyon sang fact finding committee angut sa kontrobersiya sa diin naangut ang iya pangalan kag administrative officer Andreo Llaver.
Ginpahayag ni Capiz Rehabilitation Center provincial jailwarden Arjuna Yngcong nga napamatud-an sini nga wala siya sang sala kag ginhingabot lamang ang iya nga posisyon sang mga indibidwal nga interesado diri.
Partikular nga ginhatagan sang pagtamod sang opisyal ang alegasyon nga ginabuhinan sini ang hazard pay sang mga empleyado.
Suno kay Yngcong nga indi mahimo nga buhinan sini ang hazard pay sang mga empleyado bangud siya mismo ang nag-request sa gobernador.
Ini matapos nakita sini sang panahon nga ginpaidalum sa lockdown ang probinsiya nga madamo nga personnel sang CRC ang nagaguwa pasulod sa ospital nga wala sang hazard pay.
Nagpasalig man si Yngcong, pananglitan nga makabalik sa CRC, pagatumanon sini ang nangin rekomendasyon sang fact finding committee nga indi na pagpahanugutan ang paghupot sang mga kasapatan.
Apang ginklaro sini nga ginpahanugutan lamang sini sadto ang paghupot sang mga kasapatan kasubong sang pantat, manok kag baboy bangud nagaserbe ini nga palangabuy-anan sang mga Persons Deprived of Liberty (PDL’s).
Nahibaluan pa nga kasubong partnership man ini sang mga jailguards kag PDLs bangud ang ila ginatunga ang ma-ginansiya.
Pabor man si Yngcong sa nangin rekomendasyon sang komite nga ipaidalum sa random drug testing ang mga personnel agud mahibaluan kun sin-o ang nagagamit.
Samtang magakunsulta ini sa iya abogado angut sa pagahimoon nga tikang sa persona nga nagmantsa sa iya pangalan bangud luyag sini nga mahatagan sang leksyon ang nangin kaupod sa CRC.
