PONTEVEDRA, CAPIZ – Ginahulat na lamang sang mga kapulisan kag pamilya sang mag-utod nga ginluthang-patay sa Barangay Lantangan Pontevedra, Capiz ang resulta sang ila post mortem examination kag death certificate.
Ginkilala ang duha ka mga biktima nga amo sanday Fhlome kag Melfer Bangud nga lunsay mga residente sang Sitio Lunok, Barangay Vizcaya, President Roxas, Capiz.
Ang nasambit nga mga dokumento ginahulat nalang sa karon agud matigayon nga mapasakaan sang panumbungon ang suspek nga si Kagawad Joseph Manican sang amo man nga lugar nga ginatudlo nagluthang sa mag-utod.
Matandaan nga ginkustodiya sa Pontevedra Municipal Police Station si Manican matapos nga may yara sang duha ka mga witnesses nga nakakita sa natabo nga insidente.
Apang gilayon man ini gin-release sa karsel matapos nagtakup ang 36 ka oras nga reglementary period of detention rason nga nahulog na lamang ini sa regular filing.
