ROXAS CITY – Posible nga sa maabot nga Biyernes nga adlaw ipaguwa ang resulta sang swab test nga ginpatigayon sa isa ka construction worker nga taga-Barangay Balucuan, Sigma, Capiz nga una nag-positibo sa ginpatigayon nga rapid test sang damlag lang.
Ini ang ginpahayag sang Public Information Officer sang Capiz Provincial Health Office nga si Ayr Altavas sang mainterview sang Bombo Radyo.
Suno kay Altavas nga sadtong Mayo 12 ginkuhaan sang specimen sample ang 50 anyos nga construction worker nga lalaki kag ginpadala sa Western Visayas Medical Center sa siyudad sang Iloilo para sa swab testing.
Suno diri nga sadtong Mayo 11 sang ginpaidalom sa rapid testing ang amo nga lalaki kaupod ang duha ka iban pa nga naga-edad sang 29 anyos kag 34 anyos, lunsay kalalakinhan, nga na-stranded sa Capiz-Iloilo border sa Barangay Aglalana, Dumarao.
Ginpahayag ni Altavas nga gindala sila nga tatlo sa Roxas Memorial Provincial Hospital para sa rapid testing antes kuntani papulion sa banwa sang Sigma.
Apang matapos nagpositibo sa amo nga test ang 50 anyos nga construction worker, ginpabilin ini sa nasambit nga ospital para sa hospital quarantine.
Samtang ang duha sini ka mga kaupdanan nga nag-negatibo ang yara na sa community isolation facility sa banwa sang Sigma kag didto sila gina-monitor samtang nagapadayon ang ila nga quarantine period.
