ROXAS CITY – Nagpabalhag sang reklamo ang isa ka retired DepEd employee matapos nga ginaalegar tuyo nga sudlon sang isa ka persona ang ila sini nga balay sa Barangay Lawaan, Roxas City.
Suno sa tagreklamo nga si Jover Ibanez, 63 anyos sang nasambit nga lugar nga madasig nga ginbuksan sang suspek nga si Julio Botante Jr., 41 anyos sang nasambit nga lugar.
Ginbuksan sini ang gate sang tagreklamo kag tuyo kuntani nga sudlon ang balay apang wala ini nangin madinalag-on ang iya nga pagsulod.
Bangud diri, ginpakamaayo na lamang sang tagreklamo nga iparekord sa pulisya ang insidente.
Sa kaangut nga balita, matapos nga ginsulod sang suspek ang balay sang tagreklamo, ginkadtuan sang mga BPAT ang balay sang suspek kag tuyo kuntani nga istoryahon kag dal-on sa barangay apang hinali na lamang nga ginsumbag sang suspek ang BPAT Member nga si Manuel Alejaga, 52 anyos sang amo man nga lugar.
Bangud diri, nag-angkon sang pagpalanakit sa kalawasan ang nasambit nga BPAT Member.
