ROXAS CITY – Patay ang isa ka senior citizen matapos mabungguan sang bus samtang nagabisikleta sa Barangay San Jose, banwa sang Dumalag, Capiz.
Ginkilala ang biktima kay Roberta Trazo, 74 anyos, retired municipal administrator kag residente sang Barangay Poblacion Ilaya, sang nasambit man nga banwa.
Base sa inisyal nga imbestigasyon sang Dumalag Municipal Police Station, samtang nagabisikleta, nabungguan ang biktima sang kasugata nga bus nga nagabiyahe Roxas-Tapaz nga ginamaneho ni Domingo Estares, 51 anyos, residente sang Barangay Manhoy, Dao, Capiz.
Bangud sa kabaskugon sang pagkabunggo, tumampilak sa dalan ang biktima.
Nag-angkon sang patal nga pilas sa ulo kag iban pa nga porsyon sang lawas ang biktima nga nagresulta sa iya kamatayon.
Gindala pa ang biktima sa ospital apang gindeklarar nga dead on arrival.
Gilayon naman nga nagsungka sa mga otoridad ang driver sang bus.
