Gintaasan sang double digit ang revenue goals sang Bureau of Internal Revenue (BIR) kag Bureau of Customs (BOC) sa 2025.
Sa idalum sang Budget of Expenditures and Sources of Financing sang Department of Budget and Management (DBM), ang BIR ginmanduan nga magkolekta sang P2.85-T subong nga tuig, samtang ang revenue collection target sang BOC naman P939.6-B.
Para sa masunod nga tuig, ang BIR ginmanduan nga magkolekta sang P3.2-T samtang ang BOC P1.06-T.
Ang nasambit nga revenue goals, target malab-ot pinaagi sa ginpasangkad nga collection efficiency kag pagpasa sa pila ka tax measures.
Mahibaluan nga ang priority measures sang DOF amu ang Imposition of Excise Tax on Single-use Plastics (SUPs), Package 4 of the Comprehensive Tax Reform Program (CTRP), Rationalization of the Mining Fiscal Regime, kag Reform on the Motor Vehicle Users’ Charge (MVUC).
Sa nauna nga statement, ginsiling sang DOF nga ang kabug-usan nga revenue collection para sa subong nga tuig ginalauman nga magataas sa P4.42-T, lagpas sa full-year target nga P4.27 trillion.
Sa una nga 10 bulan sang tuig, ang DOF ang nakakolekta na sang kabug-usan nga revenues nga P3.77-T, mas mataas sang 16.8 percent kung ikumparar sa kapareho nga panahon sadtong tinalikdan nga tuig.
Samtang ang tax collections, nagtaas sang 11.4 percent sa P3.23 trillion sumugod Enero tubtob Oktobre 2024, samtang ang non-tax revenues nagsirit sang 64.9 percent sa P 539.40-B.
