ROXAS CITY, CAPIZ- Ginpatpat sang isa ka abogado ang kabangdanan sang ginpaguwa sang Korte Suprema sang Pilipinas nga Revised Law Student Practice Rule (R-LSPR) bilang kabahin sang padayon sini nga reporma sa legal education kag access to justice sa pungsod.
Sa interview sang Bombo Radyo kay Atty. Elica Mariz Fuentes, sang Integrated Bar of the Philippines Capiz Chapter, iya ginpahayag nga sa idalom sang bag-o nga pagsulundan, ginpalapad ang sakop sang mga kinamatarong nga ginahatag sa mga tumuluon sang abogasya agud nga makahatag sang libre nga serbisyo legal sa mga nagakinahanglan, apisar nga indi pa sila ganap nga abogado. Katuyuan sang nasambit nga reporma nga mas mapasangkad ang klinikal nga edukasyon sa layi kag maaksyunan ang kakulangan sa legal aid sa mga komunidad.
Suno kay Atty. Fuentes, sandig a bag-o nga pagsulundan, may duha ka kategorya sang mga estudyante ang mahimo nga ma-practice, una amo ang Law Student Practitioner I para sa mga third-year law students nga may bastante nga academic standing kag ginapahanugutan nga magpractice sa idalom sang supervision sang isa ka abogado kag ang ikaduha, amo ang Law Student Practitioner II para sa mga fourth-year ukon graduating law students nga mahimo magpatigayon sang mas malapad nga legal functions kaangay sang pag-atubang sa korte, basta kag may yara sang assistance sang clinical legal education program kag lisensyado nga abogado.
Pahayag pa nya, ang R-LSPR ang kabahin sang Access to Justice Program, nga may katuyuan nga mahatagan sang legal nga bulig ang mga kubos kag yara sa laylayan sang sosyudad. Ginapabaskog man sini ang integrasyon sang Clinical Legal Education Program (CLEP) sa mga law school bilang kabahin sang curriculum.
Nahibaluan nga para naman sa mga maglapas sa prebilihiyo nga pagpractice, may nagakaigo nga panumbungon.
Nagpahanumdom ang natungdan, sa mga law practitioners, nga indi lang maglapaw agud nga matawhay kag secure ang puturo.
Interviewed by Bombo Roadnie Dalanon