ROXAS CITY – Magahatag sang padya si Capiz 1st District Congressman Emmanuel Tawi Billones Sr., sa sinuman nga makatudlo sa suspek nga responsable sa pagluthang-patay kay Punong Barangay Elvis Asis sang Barangay Lawaan sining siyudad.
Sa interview sang Bombo Radyo kay Billones, ginpahayag sini nga nakahanda siya nga maghatag sang 50 mil pesos sa makahatag sang impormasyon angut sa suspek nga yara sa likod sang nasambit nga krimen.
Suno sa iya, luyag sini nga mahatagan sang hustisya ang kamatayon ni Asis nga ginakabig sini suod nga abyan kag kaalyado sa Partido Liberal.
Panawagan pa sang nasambit nga opisyal sa publiko nga gilayon magpalab-ot sa mga otoridad sang mga impormasyon nga makabulig sa nasambit nga kaso.
Matandaan nga gintambangan sang ginapahayag riding-in-tandem sa Kilometer 2, Barangay Lawaan si Asis kag ginluthang nga gintunaan sang iya nga kamatayon.
