Nagpabutyag sang indi pag-ugyon ang aktres nga si Rica Peralejo sa plano sang Bureau of Internal Revenue (BIR) nga magbutang sang registration seal sa online platforms sang mga content creators kag iban pa nga digital earners.
Suno kay Rica, nagabayad na siya sang buhis humalin sang nagsugod siya sa pag-arte sa edad nga 13 anyos.
Ginkwestyon sang aktres kun ngaa kinahanglan pa niya nga ipakita ang registration seal samtang madugay na niya nga ginasunod ang iya obligasyon bilang taxpayer.
Dugang pa niya, mas mabaton kuntani ang kaangay nga tikang kun wala ginkawatan ang mga Pilipino sang mga kurakot nga opisyal.
Nagpabutyag man ini sang pagkadismaya sa pagbutang sang deadline sa registration seal sa ila online platforms nga suno sa iya makainsulto sa tunga sang mga isyu sang korapsyon sa gobyerno.
Ang implementasyon nga plano sang BIR ang nagasakop sang mga online sellers, freelancers, professionals, vloggers, influencers kag iban pa nga nagakita pinaagi sa digital platforms.
