ROXAS CITY – Ginbisitahan sang mga katapo sang Department of Health (DOH) central office kag Research Institute for Tropical Medicine (RITM) ang pila ka mga lugar nga posible patukuran sang real-time polymerase chain reaction (RT-PCR) testing laboratory sa Capiz.
Ini ang ginpahayag ni Provincial Health Officer Dr. Leah Del Rosario sang mainterview sang Bombo Radyo.
Una nga nagpakigsapol ang mga katapo sang nasambit nga mga ahensiya kay Governor Esteban Evan ‘Nonoy’ Contreras agud hinalaan ang pila ka mga preparasyon sa pagpatukod sang nasambit nga laboratoryo.
Diri gintalakay ang mga pagahimuon nga trainings, mga kagamitan kag lisensiya nga kinahanglanon para sa pagpatukod sini.
May yara naman sang tatlo ka mga opsyon nga ginapilian para sa amo nga plano.
Kalakip na diri ang paggamit sa existing laboratory sang probinsiya kag pag-upgrade diri bilang Bio-Safety Level 2 laboratory; pagpatukod sang bag-o nga laboratoryo ukon pagbakal sang isa ka pop-up ukon relocatable containerized RT-PCR laboratory.
Target nga matukod ang amo nga laboratoryo sa sulod sang duha ka bulan agud gilayon nga maggamit sa mga magapauli nga mga Locally-Stranded Individuals (LSI’s) kag Returning Overseas Filipinos (ROF’s) sa probinsiya.
