River-control sa isa ka banwa sa Capiz, natiphag kasunod sang pagbubo sang mamunog nga ulan

ROXAS CITY – Natiphag ang river-control sa Barangay Tico, Panay, Capiz kasunod sang pagbubo sang mamunog nga ulan tuga sang inter-tropical convergence zone nga nagaapekto sa karon sa probinsiya.
Sa interview kay Provincial Disaster Risk Reduction and Management Office (PDDRMO) Action Officer Esperidion Pelaez, ginpahayag sini nga amat-amat nga natiphag ang nasambit nga river-control bangud sa mabaskog nga current sang tubig-baha sa nasambit nga suba.
Sa ginpatigayon nga ocular inspection sang ahensiya, wala sang kabalayan nga nahalitan ukon pamilya nga naapektuhan sa pag-collapsed sang nasambit nga river-control.
Sa karon, nagapabilin nga lubog sa tubig-baha ang tatlo ka mga barangay sa probinsiya kag nagapadayon naman ang monitoring sa mga kabanwahanan.
Ginpasiguro naman sang ahensiya nga nakahanda ang mga responding units sini agud magresponde sa tion nga kinahanglanon.